Detaje tronditëse: Një person dyshohet se u vra me ‘teshlicë’ në Qendrën e Shurdhmemecëve në Mitrovicë

Një ngjarje e rëndë ka ndodhur pasditen e sotme në Qendrën e Shurdhmemecëve në qytetin e Mitrovicës, ku një person është gjetur pa shenja jete, raporton Gazeta Sinjali.

Sinjali ka mësuar detaje të reja nga rasti, ku sipas burimeve ngjarja ka ndodhur si pasojë e një rrahje mes disa personave që janë pjesë e kësaj qendre, me ç’rast pas përdorimit të mjeteve të forta (teshlicë), një person ka humbur jetën.

Burimet bëjnë me dije se viktima dyshohet të jetë rreth 60 vjeç dhe sipas informacioneve të para dyshohet se bëhet fjalë për vrasje.

Sinjali ka kontaktuar me Policinë e Kosovës në Mitrovicë, mirëpo të njëjtit ende nuk kanë informacione zyrtare lidhur me rastin.

Ndërkohë sinjalizuesit e Gazetës Sinjali kanë dërguar pamje nga vendi i ngjarjes në afërsi të shkollës fillore ‘Eqrem Çabej’, ku shihet se të pranishëm atje janë njësitë policore të cilët kanë rrethuar me shirit vendin ku dyshohet se ndodhi ngjarja e rëndë.