52-vjeçari kapet mat me 15-vjeçaren në veturë, dyshohet se e dhunoi

Pothuajse çdo vit në Kosovë raportohet për dhjetëra raste të sulmeve seksuale e dhunimeve. Në vitet e fundit numri i këtyre rasteve është rritur, derisa të miturat janë ndër më të sulmuarat. Për një rast të dhunimit për të cilin po dyshohet një 52-vjeçar nga Prizreni, Policia tashmë ka nisur hetimet. 

Sinjali mëson i dyshuari ka rënë në prangat e Policisë, pasi u kap mat, në veturën e tij, bashkë me një të mitur. 

Burimet nga Prokuroria thonë se bëhet fjalë për një 15-vjeçare, e cila dyshohet se është keqpërdorur seksualisht nga burri 52-vjeçar. 

Rasti u zbulua derisa Policia ishte duke patrulluar në një pikë kontrolli, në rrugën “Ekrem Rexha”, në Prizren, ku ndaloi veturën që e drejtonte i dyshuari. 

Pas verifikimit dhe mbledhjes së informacioneve fillestare, rezultoi se e mitura që u kap në veturë me 52-vjeçarin dyshohet se është dhunuar nga i njëjti. 

Dy palët janë shoqëruar në stacion policor për intervistim, ku kanë dhënë deklaratat e tyre për rastin. 

Ndaj të dyshuarit, Prokurori i Shtetit ka urdhëruar nisjen e hetimeve për veprën penale “dhunimi” për zbardhjen e rrethanave në të cilat dyshohet se është kryer vepra.