Suharekasi Berat Gegaj nderohet në ShBA me “Medaljen e shërbimit të dalluar”
Themeluesi i organizatës jo qeveritare “Kosovo Hope”, shqiptari nga Suhareka, Berat Gegaj, është nderuar me çmimin “Medalja e Shërbimit të Dalluar”, për përkushtimin e tij në evakuimin dhe ndihmën ndaj refugjatëve afganë.
Ai për Albanian Post ka thënë se në ceremoninë e 10 vjetorit të binjakëzimit të Iowas me Kosovën, çmimi i ndarë ishte i papritur për të.
“Jam ndier i nderuar me këtë çmim, që pas 20 vjetëve ne tashmë mund të bashkohemi me amerikanët dhe të jemi bashkë në shpëtimin dhe ndihmën e të tjerëve në nevojë”.
Ai ka thënë se këtë dekoratë e mori nga Senatori amerikan, Zach Nunn, dhe Legjislatura Shtetërore e Iowas.
“Senatori Nunn dhe Legjislatura Shtetërore e Iowas, më nderuan me çmimin e lartë “Medalje e Shërbimit të Dalluar”, për përkushtimin tim në shpëtimin, evakuimin, ndihmën për refugjatët nga Afganistani”, ka thënë ai.
Gjatë kësaj ceremonie prezent ishte edhe Ministri i Mbrojtjes në Kosovë, Armend Mehaj, Ministrja e Punëve të Jashtme, Donika Gërvalla, Delegacioni ushtarak i Iowas dhe Kosovës e të tjerë.
Ndërkaq, Kosova e cila ishte një ndër shtetet që i kishte hapur dyert për strehimin e qytetarëve afganë, të njëjtit institucionet e vendit i vendosën në dy kampe.
Afganët ishin dhe vazhdojnë të jenë të mbyllur në kampin ushtarak amerikan Bondsteel dhe në kampin tjetër afër tij i njohur si kampi ndërtimor Bechtel-Enka.
Ambasada e Shteteve të Bashkuara të Amerikës (SHBA), më pesë nëntor ka bërë të ditur përmes rrjetit social Twitter se rreth 100 afganë që ishin strehuar në Kosovë tashmë janë nisur drejt SHBA-së.
Ndërkohë, mbi 500 shtetas afganë të cilët ishin strehuar në Kosovë përgjatë muajve të fundit, më 27 tetor janë larguar në drejtim të SHBA-ve.
Ky eksod i tyre ndodhi pasi talebanët morën kontrollin mbi këtë shtet në muajin gusht.
Në Kosovë të strehuar kanë qenë 683 shtetas afganë. Grupi i parë i afganëve në Kosovë kishte arritur më 29 gusht, ku raportohej të ishte një grup prej 111 personave. /Albanianpost.com
